Tut ils 50 schuldads ospitalisads en la caserna Jassbach mussan in meglierament da la sanadad. 35 dals schuldads han gia bandunà ier l'ospital. Il rest po turnar oz enavos tar la truppa e alura far fin d'emna. Quai ha ditg in pledader dal Departament federal da defensiun, protecziun da la populaziun e sport envers SRF News.
Er la quarantina ch'è vegnida proclamada ier è vegnida abolida. Ina malsogna contagiusa possian ins sclauder or. Ils motivs per l'incident n'èn anc betg sclerids. Anc na possian ins betg sclauder or ina tissientada chaschunada da vivondas.
Attatgas da flaivlezza tar recruts
La gievgia suentermezdi avevan plirs recruts annunzià da sa sentir fitg mal, per part stuevan els era render fitg ed avevan la fuira. Intgins dals schuldads eran schizunt curt senza schientscha.
Sin a quai aveva l'armada transportà ils schuldads cun ambulanzas ed helicopters en ospitals ed en indrizs sanitars da l’armada. Quatter schuldads sajan stads en in stadi critic, aveva ditg il pledader da l’armada Daniel Reist ed uschia confermà rapports da medias.
En la caserna da Jassbach en l'Emmental aveva cumenzà avant trais emnas la scola da recruta per la guerra electronica.
RR novitads 20:00