Las dunnas han survegnì era il 2020 bler pli paucs daners da las cassas da pensiun ch’ils umens. Quai mussan las cifras actualas da l’Uffizi federal da statistica. L’uschènumnà import median da las rentas da las cassas da pensiun tar las dunnas muntava a 1’167 francs. Tar ils umens eran quai bundant 900 francs dapli mintga mais.
Tenor la Confederaziun èn las differenzas tranter umens e dunnas d’attribuir a las carrieras professiunalas differentas. Per motivs famigliars interrumpan dunnas pli savens lur lavur e lavuran era dapli a temp parzial. Dentant era l'inegualitad da pajas è in motiv per la differenza.
Rentas èn preferidas
Il 2020 ha var la mesadad da las persunas che retiran da nov ina prestaziun d'ina cassa da pensiun, elegì sulettamain ina renta. Tar las dunnas eran quai 51%, tar ils umens 42%. Radund in terz han retratg mo in chapital, cun 34% tuttina tar dunnas ed umens. E las ulteriuras persunas, 14% da las dunnas e 34% dals umens – èn sa decididas per ina cumbinaziun da prestaziun e renta e chapital.
