Nagina da las radund 70 cassas da pensiun han cuntanschì ina performance positiva. Tenor las calculaziuns da la banca gronda UBS munta la performance da las investiziuns finanzialas da las cassas da pensiun en media a -5,61%. Il favrer era quai anc -2,31%. Il schaner era la performance anc positiva.
Pli pitschnas e pli pertutgadas
Surtut las cassas pitschnas èn pertutgadas:
- -5,08% tar cassas da pensiun grondas (passa 1 milliarda francs facultad administrada)
- -5,37% tar cassas mesaunas (300 milliuns fin 1 milliarda francs facultad administrada)
- -6,17% tar cassas pitschnas (main che 300 milliuns francs facultad administrada)
Il svilup negativ da las investiziuns finanzialas saja en emprima lingia d'attribuir a las turbulenzas pervia da la crisa da corona, communitgescha la banca UBS. Il meglier resultat muntia a -2,67% ed il mender a -10,74%.
En general hajan investiziuns alternativas purtà cleramain dapli gudogn ch'aczias u emprests. Surtut aczias da l'exteriur han tenor la UBS patì, fertant ch'il martgà d'aczias svizzer è sa revegnì pli spert da la «baisse» dal mars.