Siglir tar il cuntegn
Inhalt

Svizra Cassis conferma lingias cotschnas

Il Cussglier federal Ignazio Cassis conferma las lingias cotschnas pertutgant las negoziaziuns cun l’Uniun europeica davart ina cunvegna da basa.

Purtret da Cassis.
Legenda: Ignazio Cassi ha infurmà oz davart il stan actual cun las contractivas da l'UE. Keystone

La protecziun da pajas minimalas sco era las cundiziuns minimalas da lavur restian. Il Cussegl federal tegna ferm vid las lingias cotschnas, uschia il minister da l'exteriur Ignazio Cassis. Dentant vul Cassis discutar durant la stad davart il stan actual da las negoziaziuns cun ils partenaris socials ed ils chantuns. Ins vul guardar sch'i dat tuttina in spazi da giugar cun las mesiras accumpagnantas.

Las lingias cotschnas procurian che la qualitad resta, ma tut tenor chattian ins autras soluziun. Uschia possian ins cuntinuar a negoziar cun l'UE. Insatgi sto vegnir encunter. Sche betg, rest’ins airi. La finamira resta numnadamain dad avair enfin la fin da l'onn ina cunvegna da basa cun l'UE.

Mesiras accumpagnantas

Mesiras accumpagnantas

Las mesiras accumpagnantas procuran che firmas da l'exteriur che vegnan en Svizra sa tegnan vi da las cundiziuns da lavur e las pajas minimalas ch'èn prescrittas en Svizra. Las mesiras en vegnidas introducidas il 2004, quai en connex cun l'introducziun da la libra circulaziun da persunas cun l'UE.

Vinavant ha el dà ina survista da la situaziun actuala da las negoziaziuns. Dapi il mars sajan ins s'inscuntrà gia 5 giadas cun l'Uniun Europeica, per negoziar davart ina cunvegna da basa. Vitiers vegnian 3 inscunters sin livel dals schef-coordinaturs.

Il Cussegl federal suttastritga plinavant ch'i na dettia nagina cunvegna da basa sche la bursa svizra na vegnia betg renconuschida cumplainamain da l'UE.

Ina proxima analisa da la situaziun duai dar suenter la stad.

RR actualitad 17:00