Da sortir dad ina cunvegna d'atom saja in general in sbagl – uschia il cusseglier federal e minister da l'exteriur Ignazio Cassis il mardi avant las medias. La decisiun da Trump saja bain stada da spetgar, las consequenzas sajan dentant imprevisiblas al mument.
I vegnia fatg quint, che las sancziuns smanatschadas vegnian realisadas: «Co precis, cura e sche las sancziuns vegnan na sa nagin. Nus crajan dentant ch'i vegn a dar las sancziuns» di Cassis. Sco consequenza tema il cusseglier federal er ina destabilisaziun en il Orient Central. La Svizra sa mettia a disposiziun per fascilitaziun e mediaziun:
Nus essan preoccupads dad effects negativs per l'economia causa las sancziuns ed ina escalaziun da violenza en l'Orient Central.
Las raschuns che Donald Trump numna per extrar dal contract èn multifaras: Uschia sustegnia il régime da l'Iran il terrorissem, destabiliseschia l'Orient Proxim ed haja cuntinuà da sviluppar armas atomaras er suenter la cunvegna.
L'Iran è dividì en sia posiziun
Il president iranais Hassan Ruhani dad ina vart ha ditg a la televisun, ch'el veglia tuttina sa tegnair vinavant vid la cunvegna. Enstagl d'ina cunvegna cun sis stadis hajan ins ussa ina cun tschintg. El n'acceptassia betg, che Trump gudognia questa guerra psicologica.
Da l'autra vart smanatscha il manader politic e religius da bandunar la cunvegna d'atom. Sche l'Europa na possia betg garantir ch'ella vegnia realisada sco fatg giu, stoppia quai esser la consequenza, ha ditg Ajatollah Ali Chamenei.
Chamenei ha era avertì da betg sa fidar da la Germania, la Frantscha e la Gronda Britannia, cunquai ch'i sajan ils amis dals Stadis Unids da l'America.
L'UE vul sa tegnair vinavant vi da la cunvegna
Da vart da l'UE hai num ch'ins veglia er vinavant la cunvegna, uschè ditg che l'Iran sa tegnia vi da sias obligaziuns. il glindesdi vulan ils ministers da l'exteriur da la Germania, Frantscha e Gronda Britannia s'inscuntrar cun l'Iran per discutar l'avegnir da la cunvegna.
L’Iran ha signà il contract il 2015 cun ils tschintg stadis da veto da las Naziuns Unidas – quai èn la Russia, la China, la Gronda Britannia, la Frantscha ed ils Stadis Unids – sco er anc cun la Germania. La republica islama dal Iran era sa declerada pronta da renunziar sin il svilup d’armas nuclearas e da dar access a sias ovras atomaras. Sco cuntramesira avevan ils stadis dal vest schlià las sancziuns cunter l’Iran.
Svizra ha envidà il president iranais Hassan Ruhani
Er la Svizra ha appellà a tut ils participants da la cunvegna da cuntinuar cun quella. Enpli ha il minister da l'exteriur Ignazio Cassis confermà in'invitaziun al president da l'Iran Hassan Ruhani per discurs en Svizra. Ina tala visita saja planisada questa stà, dentant n'haja il president anc betg respundì.
L'invit saja uss anc pli avert sco avant ha Cassis ditg avant las medias.
RR novitads 17:00
