Siglir tar il cuntegn

Svizra Cassis metta Seiler a la testa dals affars exteriurs

In'emna en uffizi ha il cusseglier federal Ignazio Cassis clamà Markus Seiler sco nov secretari general dal Departament federal d'affars exteriurs.

markus seiler en situaziun da conferenza da medias
Legenda: L'actual schef dal servetsch secret svizzer Markus Seiler mida en il departament per affars exteriurs. Keystone

Markus Seiler succeda a Benno Bättig e cumenza sia nova funcziun cun il prim da december, communitgescha il Cussegl federal. Bättig vegnia a surpigliar in'autra funcziun en il departament federal per affars exteriurs.

Suenter la fusiun dal servetsch secret intern ed extern

Il num da Markus Seiler (PLD) cursava l'ultim temp en quel connex tras las medias. Seiler è già stà ina giada secretari general. Quai en il departament da defensiun tar ils cussegliers federals Samuel Schmid (PPS) ed Ueli Maurer (PPS). Maurer aveva lura delegà Seiler en il servetsch d'infurmaziun federal. Lez era sa resultà da la fusiun dal servetsch secret intern ed extern – sut la batgetta da Seiler.

Squitsch sin Seiler pervi da process en Germania

Squitsch sin Markus Seiler hai dà il davos temp pervi d'in process da spiunascha cunter in Svizzer en la Germania. Quel duai esser stà activ en la Germania sin incumbensa dal servetsch svizzer. Gievgia vegn spetgà l'emprima sentenzia da la Dretgira suprema da Frankfurt am Main en quest cas.

RR novitads 14:00