Svizra - Cassis: Nagina crisa diplomatica cun la Russia
Il minister da l’exteriur Ignazio Cassis ha suttastritgà che las activitads da spiunadi da la Russia na vegnian betg toleradas da la Svizra. Tuttina na duajan questas activitads betg procurar per dissonanzas tranter ils dus pajais. Quai ha ditg Cassis a Radio SRF.
I sa tractia dad in act da ballantscha. Talas activitads tutgian tar il mintgadi. Quest cas giaja però sur la mesira usitada d'activitads dals servetschs d'infurmaziun. I dettia uss ina tscherta escalaziun. En consequenza da l’affera da spiunadi ha la Svizra refusà d’accreditar intgins diplomats russ. Tenor in rapport da la «Sonntagszeitung» saja mintga quart diplomat russ en Svizra para in spiun.
