Siglir tar il cuntegn
Inhalt

Svizra Cassis visita sco emprim l'Italia

L'emprima visita uffiziala maina il nov minister da l'exteriur svizzer, Ignazio Cassis en l'Italia. El vul emprender d'enconuscher ses collega Angelino Alfano. Tranter auter per discurrer cun el davart la taxaziun dals cunfinaris. Radund 70'000 cunfinaris talians lavuran en Svizra.

Purtret dad Ignazio Cassis.
Legenda: Ignazio Cassis visita sco emprim pajais l'Italia. Keystone

Tar la dispita davart la taxaziun dals cunfinaris era la regenza tessinaisa mez da l'onn vegnida encunter a l'Italia. Dapi lura na pretendan els betg pli in extract dal register penal dals lavurers. Quai è stà l'ultim obstachel per ina cunvegna da taxas tranter l'Italia ed il Tessin.

En futur duain las pajas dals cunfinaris vegnir taxads per 70% en il Tessin e per 30% en l'Italia. Il mument vegn l'entira paja taxada be en il Tessin. 38% vegnan suenter surdads a l'Italia.

L'Italia è il 5avel grond partenari commerzial da la Svizra. Il volumen commerzial bilateral ha muntà l'onn passà a 34 milliardas francs.

Ulteriur punct central è la migraziun

Dasper quai vulan ils dus ministers da l'exteriur era discutar la collavuraziun tar la migraziun e la situaziun en la Mar Mediterrana e la Libia. Er la visiun da l'Italia per il futur da l'UE e lur sfidas stat sin il program.

Cassis è enfin la fin d'avust anc stà burgais dubel da l'Italia e la Svizra. Curt avant sia elecziun sco minister da l'exteriur ha el dà giu ses pass talian. Quai pass è lura vegnì valità sco concessiun a la PPS.

RR novitads 11:00