Siglir tar il cuntegn
cuntegn

Svizra Cassis vul far in pass envers l'UE

Cusseglier federal Ignazio Cassis è pront da vegnir encunter a l'UE e da tschertgar «autras vias» tar las mesiras flancantas areguard la protecziun da dumping da pajas. Quai ha el ditg a Radio SRF. Ses departament cuntradi e relativescha ils pleds da Cassis.

Cusseglier federal Ignazio Cassis
Legenda: Il minister da l'exteriur svizzer è pront per cumpromiss. Keystone

Gia daditg crititgescha Brüssel las mesiras flancantas che protegia ils lavurants da pajas da dumping e cundiziuns da lavur illegalas.

Nus stuain - tant l'UE sco er la Svizra - esser pront da siglir sur l'atgna sumbriva e chattar vias creativas
Autur: Ignazio CassisCusseglier federal

L'UE na metta betg en dumonda il prinzipi, dentant singulas reglas van per ella memia lunsch. Uschia per exempel la regla che pretenda ch'interpresas da l'UE ston s'annunziar tar las autoritads svizras otg dis avant ch'ellas vegnan en il pajais.

Autras vias - medema finamira

Cassis ha accentuà, la finamira da las mesiras flancantas saja da proteger il martgà svizzer. Quai saja dentant er pussaivel da cuntanscher sin autras vias. El crai sche omaduas varts sa dattan fadia saja pussaivel da chattar in cumpromiss.

Departament dementescha

Il Departament federal per affars exteriurs ha cuntraditg a l'impressiun che la Svizra saja pronta da vegnir encunter a l'UE tar las mesiras flancantas en connex cun las tractativas d'ina cunvegna instiziunala. Cassis n'haja betg explizitamain manegià las mesiras flancantas. Las «lingias cotschnas» ch'il Cussegl federal ha definì valian vinavant, uschia scriva il EDA.

RR novitads 17:00