Center da cyber per la Confederaziun

Cussegl federal duai intensivar stentas cunter criminalitad en l'internet.

Part davos dad ina stgaffa da computers Bild in Lightbox öffnen.

Legenda da maletgs: Enfin l'auter onn vul il Cussegl federal preschentar sia strategia da cyber. Keystone

Suenter il Cussegl dals chantuns ha oz era il Cussegl naziunal approvà cun 177 cunter duas vuschs cleramain ina moziun che pretenda da crear in center da cumpetenza surdepartamental.

Gia oz datti tar la Confederaziun differents posts che s'occupan da la segirtad da la communicaziun electronica e la segirtad da datas. Uschia infurmeschia la Centrala d'annunzia e d'analisa per la segirtad da l'infurmaziun - curt MELANI - regularmain davart ils privels e las mesiras per cumbatter la criminalitad en l'internet. Plinavant elavurescha il Cussegl federal actualmain ina nova strategia da cyber. Tut quai saja fitg impurtant ma na tanschia betg, uschia hai gì num el Cussegl naziunal.

Quest nov center da cumpetenza duai perquai rinforzar e coordinar las mesiras da la Confederaziun per la segirtad da datas e cunter attatgas ord l'internet. El na duai betg mo cussegliar ils uffizis federals mabain era pudair ordinar mesiras. Ultra da quai duai il center era esser responsabel per la scolaziun e la coordinaziun cun partenaris externs.

RR novitads 12:00