Siglir tar il cuntegn

Header

mauns dad ina dunna vi dals rintgs.
Legenda: Il RLZ Wil è il center da prestaziun per gimnastica artistica a Wil (maletg simbolic). Keystone
cuntegn

Center da trenament RLZ Wil Arrest d’inquisiziun per il scheftrenader

Il scheftrenader (40) da las gimnastas artisticas da la Svizra orientala è en arrest d'inquisiziun. Quai rapporta l’agentura da novitads svizra SDA sin fundament dad ina novitad dal portal online tagblatt.ch. A l'um vegnia renfatschà in delict sexual.

Il trenader era vegnì arrestà il mardi sin fundament d'ina denunzia. El è trenader dal center da prestaziun regiunal a Wil. Sin dumonda da la procura publica da Son Gagl saja vegnì ordinà che l’um vegnia en arrest d'inquisiziun, scriva la SDA.

Il RLZ haja dispensà ses scheftrenader per immediat, rapportan medias. Infurmaziuns dal RLZ Wil na dettia quai dentant naginas. La pagina uffiziala dal RLZ Wil en la rait n’è actualmain betg cuntanschibla.

Per l’um vala la presumziun d’innocenza.

Il center da prestaziun regiunal RLZ Wil

Il RLZ Wil è il center da prestaziun per gimnastica artistica a Wil (SG). El è in dals sis centers regiunals da l’uniun da gimnastica svizra. Il RLZ Wil furma la colliaziun dals centers da trenament chantunals en la Svizra orientala cun il center da l’uniun svizra a Magglingen. Tar quels chantuns tutga sper ils chantuns Son Gagl e Turgovia er il Grischun. Quai resorta dad ina pagina en la rait.

RR novitads 11:00