Cun il «plan B» vul la citad tessinaisa puspè daventar pli attractiva. Concret duaja vegnir construì in center da criptovaluta a Lugano. Venderdi e sonda ha lieu in congress en chaussa. Suenter ch’il secret da banca è vegnì abolì ha Lugano patì fermamain sco plazza da finanzas. 3'000 plazzas da lavur èn vegnidas stritgadas e las entradas da taglia èn sa reducidas per 30 milliuns.
Il center da criptovaluta duai carmalar interpresas che lavuran cun questa tecnologia. I duai dar novas plazzas da lavur per in public giuven urban e las novas firmas duain pajar taglia, quai spera il president da la citad Michele Foletti.
In partenari contestà
Sustegn per quest plan survegn Lugano da la firma «Tether». Quella vul investir radund 100 milliuns francs en la citad ed uschia sustegnair tranter auter interpresas giuvnas, uschenumnads «start-ups». «Tether» è dentant adina puspè en il visier da las autoritads da surveglianza. Uschia ha l’interpresa da tecnologia pajà l’onn 2021 en ils Stadis Unids in chasti pervi da faussas pretensiuns tar sias reservas monetaras. Ma: Tether datti anc, fin uss ha la firma superà tut las dispitas giuridicas en ils Stadis Unids da l’America e vala vinavant sco in dals pli impurtants criptoplayers da l’entir mund.
Or da l'archiv
