Il cusseglier naziunal dal Vallais, Philipp Matthias Bregy, è vegnì elegì sco nov president dal Center Svizra. Tar la radunanza da delegads è l'um da 46 onns vegnì elegì senza grondas discussiuns. Sia elecziun valeva dentant plitost sco formalitad, cun quai ch'el era il sulet candidat.
Philipp Matthias Bregy è dapi il 2019 cusseglier naziunal. Dapi il 2021 è el president da la fracziun dal Center en la Chasa federala. Experientscha politica ha el tranter auter rimnà sco cusseglier grond dal Vallais e sco president da vischnanca da Naters. Da professiun è el advocat e bab da dus uffants.
Bregy empermetta cuntinuaziun
Tar ses pled inaugural ha Bregy menziunà da vulair cuntinuar la via d'enfin uss e da sviluppar vinavant la partida sco center ferm e constructiv. El veglia esser «avert, direct e pront per il dialog».
Curt avant aveva Gerhard Pfister tegnì ses pled d'adia. En quel aveva el accentuà l'impurtanza d'in ferm center politic. En temps nua ch'i dettia adina dapli polarisaziun, dovria ina partida che fa punts e ch'è pronta per il dialog – malgrà posiziuns cleras. Gerhard Pfister ha survegnì grond laud per sia lavur durant ils ultims onns. Durant il temp da la fusiun da PCD e PBD saja el stà «il dretg um al dretg temp».
Gerhard Pfister: «9 onns èn avunda»
Il cumenzament da l'onn ha Gerhard Pfister – suenter 9 onns sco president – annunzià da dar giu ses post. I saja il dretg mument per la partida, ed era per el sez. Il temp da preparar las proximas elecziuns cumenzia pir l’atun. Vitiers termineschia la partida questa stad las lavurs vi da la nova strategia da partida 2033.
Persequità l’entira carriera dal politicher dal chantun Zug al timun da la partida ha noss correspundent en la Chasa federala Adrian Camartin. Suenter l'annunzia da la demissiun da Gerhard Pfister ha el per nus mess a lieu la decisiun da Gerhard Pfister.
RTR: I saja il dretg mument da surdar la batgetta. Quai ha Gerhard Pfister ditg il glindesdi. Èsi propi il dretg mument?
Adrian Camartin: Ord vista strategica, quai che pertutga la partida, crai jau schon ch’igl è il dretg mument da far quest pass. Nus essan anc en l’emprima mesadad da la legislatura. E quai è in bun mument da surdar il post. La successura u il successur da Gerhard Pfister ha uschia anc flot temp da metter agens accents, plazzar persunas e preparar la partida per las elecziuns federalas dal 2027. Ultra da quai è la partida gist vi d’elavurar ina nova strategia per ils onns fin il 2033. Cunquai èsi propi il dretg mument da far questa midada che n’è betg simpla.
E lura crai jau era ch’igl è il dretg mument per Gerhard Pfister da far quest pass. 9 onns en questa funcziun laschan schon enavos fastizs. President da partida èn ins durant 24 onns, set dis ad emna. Ed era sch’el ha ditg che dad esser president da partida da l’Allianza dal Center saja in’incumbensa fantastic ha el er agiuntà – ch’i saja era ina lavur strapatschusa.
Avant 9 onns ha Gerhard Pfister surpiglià il timun da la PCD, questa stad chala el sco president da l’Allianza dal Center. En quest temp è capità bler. Tge partida surdat el en novs mauns?
Ina tut autra che quella ch’el aveva surpiglià. A Gerhard Pfister è gartegià, quai che strusch insatgi avess patratgà ch’i saja pussaivel. El ha franà il digren da votantas e da votants. Ed a chaschun da las davosas elecziuns federalas il 2023 ha l’Allianza dal Center pudì augmentar sia quota d’electurs ed electuras.
Contribuì a questa gronda midada han cunzunt duas decisiuns che Gerhard Pfister ha inizià e realisà. La fusiun da la PCD cun la PBD – ed en quest connex la midada dal num da la partida, davent cun l’etichetta catolica e persuenter in cler accent sin il center dal spectrum politic. Retrospectiv pon ins dir, igl è stà la dretga decisiun.
Pia ina bilantscha tras e tras positiva?
Gliez lura era betg. E quai ha tenor mai era da far cun sia persuna, il caracter cumpetitiv e provocant da Gerhard Pfister. El ha centralisà la partida. Ils gremis naziunals èn ozendi pli impurtants e cumondan la direcziun. Per ina partida ch’è enragischada en las regiuns ruralas e tegna aut il federalissem – è quai stà bunamain ina midada da paradigma.
Che l’Allianza dal Center è dentant anc adina ina partida cun in vast spectrum da posiziuns, mussan adina puspè ils represchentants da la partida en il Cussegl dals chantuns. Bain inqual giada han lezs sepulì ils plans da lur president ed uschia mussà a Pfister ses cunfins.