Siglir tar il cuntegn

Header

Navigaziun

Ina schurma da cabels en ina stanza cun servers.
Legenda: Anc dalunsch davent da la realisaziun – il Departament da defaisa federal cumbatta cun ses centers da datas. Keystone
cuntegn

Centers da datas federals Anc betg realisads – e gia en difficultads

Il Departament federal da defaisa ha planisà plirs centers da datas – tar dus da quels datti dentant gronds problems. Quai rapporta la pagina online da SRF.

Curt & concis:

  • Conservar datas er en cas da crisas segiramain – quai è la finamira dad ina rait da trais centers da datas dal Departament da defaisa federal.
  • Ils trais centers avessan stuì esser pronts fin il 2022. Custs: Radund ina milliarda francs.
  • Uss mussan retschertgas da SRF ch'il departament da defaisa ha tar dus centers difficultads gravantas.

Proximamain avessan plirs centers da datas dal Departament federal da defaisa stuì esser pronts – uss dentant na para quai betg dad esser il cas.

Tar dus dals trais centers planisads cumbatta il departament cun tals problems ch'els na pon betg vegnir finids sco previs fin il 2022:

Tar «Fundament» fa la geologia quitads

Tar il center da datas «Fundament» retardeschia la geologia da finir il project sco previs, ha confermà il divisiunari Thomas Süssli las retschertgas da SRF. Il fund dal center, che sa chatta en ina caverna militara secreta, haja puspè da vegnir stratg ora.

  • Consequenza: Retard da dus onns e dispita giuridica davart tgi che ha da surprender ils custs.

«Kastro II» era planisà al faus lieu

Anc pli gravanta è la situaziun tar il center da datas «Kastro II»: Dals plans resorta che quel center era planisà gist sper in anteriur deposit da muniziun da l'armada. Il deposit «Mitholz» deriva bain da la segunda guerra mundiala, savess dentant tuttina explodir.

Quai è resortì dad ina evaluaziun da l'onn 2017 – quai vul dir otg onns suenter la decisiun da construir là il center da datas. Anc avant la fin da l'onn duai esser cler, nua ch'il lieu nov per il center duai esser.

  • Consequenza: Retard da silmain sis onns. Quant che quai vegn a custar na para anc betg dad esser enconuschent.

Pertge novs centers da datas?

Personen-Box aufklappenPersonen-Box zuklappen

Ils dus centers «Fundament» e «Kastro II» duajan furmar ensemen cun il terz center «Campus» ina rait da centers da datas. Els duajan esser colliads tecnicamain, dentant betg geograficamain. Per ils custs da passa 980 milliuns francs duajan vegnir remplazzads divers centers da datas ch'èn bain anc en funcziuna, sajan dentant per part antiquads, scriva SRF. Perquai ch'ils centers duajan savair segirar las datas er en temps da crisa, duajan els star sut protecziun militara cumplaina ed er remplazzar in a l'auter, sch'in dals centers na funcziuna betg pli.

RR novitads 14:00+