Siglir tar il cuntegn

Header

cuntegn

Centers federals d'asil Inquisiziun externa pervi da violenza cunter requirents d'asil

Retschertgas da la Rundschau, da RTS e da la Wochenzeitung han parutà a la glisch cas da violenza. Persunas che sajan responsablas per la segirezza en quests centers sajan stadas violentas envers requirents, uschia la renfatscha.

Quai ha ina dimensiun che ha intimà mai d'instradar in'inquisiziun externa.
Autur: Mario Gattiker secretari dal stadi per migraziun

Uss reagescha il Secretariat da stadi per la migraziun ed instradescha ina inquisiziun externa. L’anteriur derschader federal Niklaus Oberholzer haja l’incumbensa d’investigar en chaussa. En connex cun l'investigaziun ha il secretariat suspendì 14 persunas che sajan responsablas per la segirezza en ils centers. La publicitad vegnia infurmada davart ils resultats da las inquisiziuns.

Pliras denunzias penalas

Tar ils cas che las retschertgas da las medias tractan, vai tranter auter per provocaziuns u er fridas da persunal da segirtad. Requirents e requirentas d'asil èn para er vegnids blessads. En plirs dals cas duai il persunal da segirtad avair descrit en ils rapports a moda falsifitgada tge che saja capità.

Tenor il Secretariat da stadi per la migraziun dettia denunzias penalas en connex cun plirs dals cas tractads entaifer las retschertgas da medias. I giaja per viloenza surproporziunada, maldiever da uschenumnadas «stanzas da reflexiun» u er protocolls betg corrects.

Ins haja gia instradà diversas mesiras per reducir il diever da violenza en il centers, scriva il secretariat da stadi en ina communicaziun. Ultra da quai vegnian process interns en la sparta da segirtad examinads ed i vegnia er evaluà da stgaffir in post da reclamaziun per requirentas e requirents d'asil.

audio
Per tadlar curt e cumpact
ord RTR Audio dals 05.05.2021.
laschar ir. Durada: 1 minuta 25 Secundas.

RTR novitads 11:00

Artitgels legids il pli savens