En il chantun Son Gagl ha la procura publica arrestà 10 persunas tranter 20 e 30 onns ch'han tschentà ora illegalmain 9'000 certificats da covid, ed uschia incassà autas summas da daners, tenor la procura publica fin a 800 francs pro certificat. Tar ils certificats sa tracti da
- 8'000 certificats da vaccinaziun
- 1'000 certiricats da guarids e da test
Tar intginas da las persunas inculpadas sa tracti tenor ina communicaziun da collavuraturs dad in center da test privat ch'han access al sistem naziunal per crear certificats. Quels hajan dà vinavant l'access al conto da servetsch ad auters inculpads. E lezs hajan lura tschentà ora e vendì certificats illegals.
A tut ils participads – quatter persunas svizras e sis da l'exteriur – vegn rinfatschà falsificaziun da documents. Sch'els èn culpants stoni quintar cun praschun fin a 5 onns u ina multa.
Emprims indizis gia la stad 2021
Dapi la stad 2021 ha survegnì il departament da sanadad dal chantun Sogn Gagl repetidamain avis ch'i pudess dar maldiever. Las investigaziuns sajan stadas difficilas, scriva la procura publica dal Son Gagl, perquai ch'ils avis sajan per il pli stads anonims ed en il sistem na dastgian ins betg arcunar datas dals possessurs dals certificats – quai per raschuns da protecziun da datas.
Avant in mais aveva il chantun Son Gagl annullà passa 8'000 certificats tschentads ora illegalmain. Entant ha la Confederaziun midà il proceder e pussibilitescha in monitoring regular als chantuns – ed ulteriuras midadas.