Siglir tar il cuntegn

Svizra CH ed ils Panama Papers – ils ins vulan examinar, ils auters betg

In pledader ha confermà envers Radio SRF, che l’Administraziun federala da taglias examinescha las datas dals Panama Papers. La cumissiun da finanzas dal Cussegl naziunal percunter na vul betg ch’i dettia examinaziuns da fatschentas dad off-shore en Svizra.

Frankfurt la saira, glischs fotografadas cun ina blenda lunga.
Legenda: Ils Panama Papers - lur publicaziun procurescha anc adina per agitaziuns en ina branscha che n'è betg disada la transparenza. Keystone

L’autoritad fiscala saja obligada dad identifitgar defraudants da taglia – uschia l’argumentaziun.

Dapi curt èn ils documents dals Panama Papers accessibels en l’internet. I sa tracta da 11 milliuns e-mails, brevs e documents che demussan strategias co evitar da pajar taglia. Il consorzi internaziunal da schurnalists investigativs aveva publitgà l’entschatta da l’emna datas da pliras tschient milli societads off-shore.

Cumissiun da finanzas dal Cussegl naziunal na vul nagin'examinaziun

La cumissiun da finanzas dal Cussegl naziunal percunter na vul betg ch’i dettia examinaziuns da fatschentas dad off-shore en Svizra. Quai ha ella decis cun 17 cunter 7 vuschs tar in’abstenziun.

Ils aderents han vulì dar l’incumbensa al Cussegl federal da crear ina “Task Force”. La proposta sa referescha als Panama Papers – sco ils Servetschs dal parlament han communitgà.

Medias avevan l’entschatta d’avrigl rapportà da bun 200milli societads off-shore fundadas da la chanzlia d’advocat Mossack Fonseca nua che prominents e politichers da l’entir mund duajan avair zuppà lur facultad.

En consequenza hai dà investigaziuns globalas ed ina debatta davart oasas fiscalas e lavada da daners suspectus.

RR novitads 18:00