Grazia a la generusadad da la populaziun svizra han fin uss pudì vegnir ramassà passa 10 milliuns francs per las unfrendas dal terratrembel e tsunami en l'Indonesia – ina summa che surpassa fermamain la finamira da ramassar 6,2 milliuns francs.
Nov organisaziuns d'agid svizras èn gia en acziun en l'Indonesia per gidar la populaziun pertutgada. 1,2 milliuns francs ha la Chadaina da Fortuna gia mess a disposiziun a las quatter organisaziuns ADRA, Caritas Svizra, Crusch cotschna svizra e Save the Children. Cun ulteriuras tschintg organisaziuns discuta la Chadaina da Fortuna actualmain las mesiras pli necessarias che duain vegnir finanziadas ils proxims mais.
Las activitads actualas
Las donaziuns fan pussaivel che las organisaziuns da partenadi svizras sustegnan la populaziun pertutgada en l'Indonesia en ils secturs suandants:
- Las organisaziuns repartan tendas sco era artitgels per ils basegns elementars sco matratschas, cuvertas, utensils per cuschinar e vestgadira. Per part survegnan las famiglias buns u cartas da prepaid per quests artitgels. Uschia pon las famiglias cumprar quai ch'ellas dovran propi.
- Per che la populaziun haja access ad aua da baiver, vegnan installads filters d'aua ed implants per preparaziun da l'aua ed er reparads raits e pumpas dad aua.
- Surtut en lieus, nua che famiglias vivan, vegnan installads implants sanitars per meglierar la situaziun igienica.
- Las organisaziuns al lieu porschan er agid medicinal: Ellas sustegnan centers da sanadad ed ospitals, surtut er per persunas cun impediments.
- Per uffants procuran las organisaziuns d'agid per structuras da scola da temp liber. Latiers tutgan er material da scola, gieus, cudeschs etc.
Donaziuns pon ins far vinavant e da tut temp online via www.glueckskette.ch
RR novitads 11:00