Ensemen cun la SRG SSR e radios privats ha la Chadaina da Fortuna rimnà la gievgia donaziuns per las unfrendas dals terratrembels en la Venezuela. A la fin dal di saja vegnida ensemen ina summa da 10'032'254 francs, communitgescha l'organisaziun. Dieschmillis persunas da l'entira Svizra sajan sa participadas al di da donaziuns per la Venezuela.
Ils 24 da zercladur han dus terratrembels devastants stremblì la Venezuela. Las stremblidas èn stadas las pli fermas dapi passa in tschientaner. Entaifer strusch ina minuta èn blers bajetgs sballunads. Il dumber dals morts suenter ils grevs terratrembels en la Venezuela è creschì aifer ils davos dis sin var 2'300. Da vart uffiziala hai plinavant num che passa 11'000 persunas sajan vegnidas blessadas.
Expertas ed experts teman dentant che plirs dieschmillis pudessan anc sa chattar sut las ruinas. La tschertga da persunas surviventas cuntinuescha, era sche las schanzas daventan suenter in'emna adina pli pitschnas.
Per sustegnair la Venezuela rimna la Chadaina da Fortuna daners. Donaziuns pon ins far:
- La pagina d'internet: www.chadainadafortuna.ch
- per e-banking sin il conto postal: CH82 0900 0000 1001 5000 6 (chavazzin «Erdbeben in Venezuela»)
- via il QR-code agiuntà
La catastrofa tutga in pajais ch’era gia avant ils terratrembels influenzà d’ina greva crisa sociala ed economica. Ina gronda part da la populaziun viva en gronda povradad e sut relaziuns precaras. L’access al provediment da sanadad, aua netta, nutriment e servetschs da basa era gia avant restrenschì per blers umans.
-
Bild 1 von 3. Donaziuns via telefon han era registrà il secretari general da la Lia Rumantscha Andreas Gabriel e la redactura da RTR Nora Pfister. Bildquelle: RTR.
-
Bild 2 von 3. Vi dal telefon durant l'avantmezdi èn era stads Christian Florin che maina la partiziun d'infrastructura da la Viafier retica e la moderatura da RTR Gaby Degonda. Bildquelle: RTR.
-
Bild 3 von 3. Il president da la regenza grischuna Martin Bühler (sanester) e Gieri Spescha (ambassadur da la marca Grischun) èn s'engaschads la damaun dal di da rimnada. Bildquelle: RTR.
Per quai vegnan las donaziuns duvradas
En in emprim pass vegnan las donaziuns duvradas per l’agid d’urgenza: alloschis provisorics, access ad aua da baiver netta, provediment medicinal, artitgels d’igiena sco er per la distribuziun da rauba dal basegn quotidian.
Tut tenor il svilup da la situaziun po il sustegn era cumpigliar mesiras a pli lunga vista per gidar ils umans pertutgads da puspè survegnir perspectivas per l’avegnir.