Sco quai che l'organisaziun d'agid scriva en ina communicaziun, vegnian sustegnidas 81 organisaziuns en l'agid direct, l'agid transitoric, l'agid per victualias e l'agid d'urgenza.
Sper las consequenzas per la sanadad vegnian dus mais suenter il «lockdown» er las consequenzas finanzialas da la crisa adina pli evidentas, hai num en la communicaziun a las medias. L'agid da la Chadaina da fortuna sa concentrescha sin persunas che na survegnan betg sustegn dal stadi.
La miseria è sa pegiurada
La crisa da corona haja anc pegiurà la miseria da persunas ch'han gia da cumbatter en lur vita, scriva l'organisaziun. L'agid saja fitg variant e cumpiglia uss tranter auter agid en il tegnairchasa per persunas pli veglias, transport, tgira u er il sustegn finanzial u er cun victualias.
Plinavant veglia la Chadaina da fortuna er finanziar l'agid per persunas ch'han pervia da lur status nagin access ad assicuranzas socialas.