Ils 24 da zercladur han dus terratrembels devastants stremblì la Venezuela. Las stremblidas èn las pli fermas dapi passa in tschientaner. Entaifer strusch ina minuta èn plirs bajetgs sballunads. Il dumber dals morts suenter ils grevs terratrembels en la Venezuela è creschì sin almain 1'450. Da vart uffiziala hai plinavant num che passa 3'200 persunas sajan vegnidas blessadas. Expertas ed experts teman dentant che plirs dieschmillis pudessan anc sa chattar sut las ruinas.
Ensemen cun la SRG SSR rimna la Chadaina da Fortuna ils 2 da fanadur 2026 da las 07:00 fin las 23:00 donaziuns per las unfrendas dals terratrembels en la Venezuela.
Per sustegnair la Venezuela rimna la Chadaina da Fortuna daners. Donaziuns pon ins far:
- La pagina d'internet: www.chadainadafortuna.ch
- per e-banking sin il conto postal: CH82 0900 0000 1001 5000 6 (chavazzin «Erdbeben in Venezuela»)
- via il QR-code agiuntà
ubain sin il numer da telefon 0800 87 07 07 (07:00 fin 23:00)
La catastrofa tutga in pajais ch’era gia avant ils terratrembels influenzà d’ina greva crisa sociala ed economica. Ina gronda part da la populaziun viva en gronda povradad e sut relaziuns precaras. L’access al provediment da sanadad, aua netta, nutriment e servetschs da basa era gia avant restrenschì per blers umans.
Per quai vegnan las donaziuns duvradas
En in emprim pass vegnan las donaziuns duvradas per l’agid d’urgenza: alloschis provisorics, access ad aua da baiver netta, provediment medicinal, artitgels d’igiena sco er per la distribuziun da rauba dal basegn quotidian.
Tut tenor il svilup da la situaziun po il sustegn era cumpigliar mesiras a pli lunga vista per gidar ils umans pertutgads da puspè survegnir perspectivas per l’avegnir.