Millis d’uffants en Svizra vivan en relaziuns difficilas. Els pateschan da violenza fisica u psichica sco er da negligientscha. Uffants sut sis onns èn pertutgads il pli ferm da maltractament, perquai ch’els èn savens isolads e n’han anc nagin access a conturns protegids sco la scola. Quai periclitescha il bainstar corporal, spiertal ed emoziunal. Las consequenzas da quest maltractament èn durablas. Ellas influenzeschan la sanadad psichica e relaziuns socialas e pon avair consequenzas per l’integraziun sociala e professiunala era sco creschids.
- Online sut: chadainadafortuna.ch
- Per e-banking sin il conto postal: CH82 0900 0000 1001 5000 6 (ubain cun scannar il QR-code agiuntà)
La mancanza dad alloschis adattads per las persunas pertutgadas engrevgescha la situaziun ed impedescha che blers uffants periclitads pon vegnir protegids. Cun Voss sustegn pon las organisaziuns per la protecziun d'uffants dar ad ellas ed ad els la segirezza e l’agid ch’ellas e ch’els dovran urgentamain.
Impressiuns dal di da solidaritad
-
Bild 1 von 4. Peter Payer, cusseglier guvernativ, cumplenescha oz 60 onns ed ha tuttina prendì temp per respunder telefons per la Chadaina da fortuna. Bildquelle: RTR.
-
Bild 2 von 4. Corina Casanova, anteriura canceliera federala (a sanestra) – cun nossa moderatura da radio Gaby Degonda. Bildquelle: RTR.
-
Bild 3 von 4. Er Jon Domenic Parolini, cusseglier guvernativ, è en chasa RTR e prenda encunter telefons. Bildquelle: RTR.
-
Bild 4 von 4. Marcus Caduff, cusseglier guvernativ dal Center, prenda encunter donaziuns. Bildquelle: RTR.
Giasts tar nus en chasa RTR èn quatter cussegliers guvernativs che vegnan adina puspè a prender encunter donaziuns.
Spezialmain dramatica è la situaziun en ils pajais da la zona da Sahel, dal Proxim Orient ed en l’America centrala. Là èn milliuns d’uffants sfurzads da crescher si en conturns extrem violents. Auters èn sin la fugia da violenza e conflicts armads. Oz vivan pli che 473 milliuns uffants, pia bunamain mintga sisavel uffant da tut il mund, en regiuns da conflict – in dumber da record dapi la segunda guerra mundiala. Quests uffants vivan savens en relaziuns fitg precaras ed èn exposts ad explotaziun, abus e lavur sfurzada. Savens n’han els nagin access a scolaziun.
Violenza envers uffants en tut sias furmas periclitescha l’access a furmaziun, sanadad e bainstar. Ella rinforza in ciclus da povradad e da marginalisaziun. Cun proteger quests uffants e cun sustegnair lur svilup als dain nus speranza per in meglier avegnir.