Isabelle Chassot (Allianza dal Center) represchenta da nov il chantun Friburg en il Cussegl dals chantuns. Ella è vegnida elegida cun passa 62% da las vuschs. Ses cuntracandidat Carl-Alex Ridoré (PS) n'ha gì nagina schanza.
La dunna da 56 onns è stada deputada en il parlament chantunal e 12 onns cussegliera guvernativa dal chantun Friburg. L'onn 2013 è ella sa retratga e daventada directura da l'Uffizi federal da cultura.
Duas dunnas – dentant nagin socialdemocrat
Per la Partida socialdemocratica è quai ina terrada: Per l'ina ha la PS manchentà da defender il sez da Christian Levrat en il Cussegl dals chantuns e per l'autra è quasi dapi 40 onns adina in socialdemocrat stà represchentà en la chombra pitschna a Berna.
Da nov represchentan duas dunnas il chantun Friburg: Johanna Gapany (PLD) è gia dapi l'onn 2019 cussegliera dals chantuns. Ina successiun per Christian Levrat è stada necessaria, damai che lez surpiglia il prim da december il presidi da La Posta svizra.