Er il mardi saira e la notg sin mesemna hai puspè dà ferms urizis en Svizra. A Cressier en il chantun Neuchâtel è in aual ì sur la riva or ed ha inundà il vitg tranter il Lai da Bienna ed il Lai da Neuchâtel.
Radund 120 policists, pumpiers e gidanters sajan durant l'entira notg stads en acziun per stabilisar la situaziun che saja uss sut controlla, scriva la polizia. Pliras famiglias hajan stuì tschertgar temporarmain in nov dachasa pervi da donns d'aua ed interrupziuns dal current electric. A tut ils abitants da la regiun cusseglia la polizia actualmain da far buglir l'aua avant che baiver quella.
L'autostrada tranter Bienna e Neuchâtel ha stuì vegnir serrada il mardi saira fin en la notg en omaduas direcziuns, ha communitgà la polizia. Er la via principala n'era betg pli charrabla. Vitiers avertescha la polizia da sbassadas da terren e sbuvaditschs en la regiun.