En il chantun Tessin ha la polizia arrestà duas educaturas d'ina canorta. Las duas dunnas da 24 e 41 onns vegnan suspectadas d'avair maltractà ils uffants e d'avair violà l'obligaziun da diligenza. Tenor las infurmaziuns da la polizia tessinaisa duain ellas avair fatg pitschnas blessuras als uffants e discurrì en in tun betg incommensurà cun ils uffants. Las duas dunnas èn en arrest d'inquisiziun.
La Polizia chantunala haja fatg diversas interrogaziuns e controllas en la canorta. Las investigaziuns na sajan anc betg serradas giu. Il mument na dettia dentant nagins indizis, ch'er auters educaturs u educaturas hajan fatg delicts.
Ils geniturs dad uffants pertutgads vegnian infurmads direct da la polizia. Dapli indicaziuns n'ha la Polizia chantunala dal Tessin betg communitgà.