Actualmain è il servetsch d'enviern en il chantun da Turitg organisà a moda decentrala dals nov secturs da mantegniment. Durant l’enviern vegnan controlladas mintga notg ils secturs e quels che controllan decidan nua ch'il servetsch d'enviern sto vegnir activ. Cun in sistem digital e central scrodan las giradas da controlla. L'annunzia che la via sto vegnir salada u rumida vegn a moda digitala en la centrala. Quella coordinescha lura las acziuns. Staziuns meteorologicas mesiran l’umiditad, la temperatura e las restanzas da sal sin via.
Las staziuns meteorologicas mesiran tuttas en il medem mument. Quai pussibilitescha in'intervenziun pli exacta e punctuala dal servetsch d'enviern.
Sfidas e plivalur
Las grondas sfidas sajan las differentas premissas, ch'i dettia en il chantun da Turitg. Per part sajan las vias sin 400 meters sur mar, autras sin 1'000. Vitiers vegn il grond dumber d’abitants en il chantun e las autas frequenzas da traffic sin bleras vias. Sch'i naiva, lura saja quai visibel e cler ch'ins stoppia ir a far or la naiv.
Il pli grond problem saja il glatsch ch'igl possia dar sin las vias, qua sajan las staziuns meteorologicas pli exactas. Per il project digital vegnian installadas 70-100 staziuns meteorologicas tar las vias chantunalas. Quellas rimnan differentas datas, sco per exempel l'umiditad da l'aria u la temperatura e dattan vinavant las datas a la centrala. Là vegn il servetsch d'enviern coordinà. Cun qua che las staziuns meteorologicas mesiran en plirs lieus en il medem mument po il servetsch d'enviern vegnir applitgà pli effizient e punctual.
Il chantun da Turitg investescha 9,2 milliuns francs en il nov sistem digital che duai vegnir mess en funcziun l'enviern 2024/2025. Mintg'onn duai uschia vegnir spargnà in mez milliun francs, 300'000 km dad auto dals curs da controlla e 5'000 uras da lavur che pon vegnir investidas en auters lieus.