Il cusseglier guvernativ dal chantun Zug Beat Villiger è vegni reelegì. Quai malgrà che las medias avevan rapportà mo paucs dis avant las elecziuns, che Villiger haja emprestà in auto ad ina dunna ch'aveva nagin permiss dad ir cun auto. Il cusseglier guvernativ aveva silsuenter empruvà d'impedir la rapportaziun davart il cas. Entant ha el però admess envers il Sonntagsblick dad avair gì in'affera ed avair ina figlia illegitima. Villiger che ha fatg il terz-melgier resultat, ha annunzià da vulair communitgar en in pèr dis, schebain el vegn ad acceptar l'elecziun u betg.
Cun las pli bleras vuschs è vegnì reelegì Martin Pfister era da la PCD suandà da Heinz Tännler da la PPS. Sco suletta dunna è vegnida elegida Silvia Thalmann-Gut da la PCD. Betg cuntanschì il pass en la regenza han ils candidats da las partidas sanestras. Barbara Gysel da la PS ed Andreas Hürlimman dals Verds alternativs han bain cuntanschì la maioritad absoluta, èn però crudads ora sco danvanz. Betg cuntanschì la maioritad absoluta ha Daniel Stadlin dals Verdliberals.
RR novitads 18:00