Il Cussegl federal ha stritgà plirs schlargiaments da la rait da viafier en la Svizra orientala. Uss han ils chantuns da là protestà. Las stritgadas na sajan «betg chapaivlas», scrivan ils chantuns da la Svizra orientala en ina communicaziun. Las stritgadas pertutgan tranter auter il tschancun tranter Winterthur e Son Gagl ed in futur tunnel Meilibach. Il parlament svizzer aveva decis quels.
Sperar sin il parlament
Las regenzas da la Svizra orientala na vulan «betg acceptar quest grond dischavantatg». Ellas pretendan ch'ils meds finanzials per quests projects vegnian puspè integrads en il program naziunal da l'infrastructura da la viafier. Plinavant duain vegnir realisads ulteriurs projects sco la projectaziun dal schlargiament da dus vials Tiefenwinkel sin l'axa Turitg-Cuira.
Tut questas investiziuns sajan adattadas a las finamiras da la «Perspectiva Viafier 2050» da la confederaziun, da la planisaziun dal territori e da la protecziun dal clima, hai num en la communicaziun. Ils projects che mancan duessan ussa anc vegnir resguardads «en il rom dal process politic».
