Lukas Engelberger, il president da la Conferenza svizra da las directuras e directurs chantunals da sanadad, quinta bainbaud cun ulteriuras mesiras cunter il coronavirus. En ils chantuns dettia discussiuns davart mesiras pli severas. Quai ha Engelberger ditg en in’ intervista cun il «Tages-Anzeiger».
Concret pudessan ils chantuns schlargiar l’obligatori da certificat sin ulteriuras instituziuns e secturs, per exempel sin visitaders e collavuraturas en chasas da tgira ed ospitals. Ed i saja era pussaivel d’introducir puspè la mascrina, per exempel en scolas, uschia il pli aut directur chantunal da sanadad.
Persunal stgars
Il persunal dal fatg per pudair vaccinar è stgars, sco Engelberger di. I dovria er anc persunal per las equipas mobilas che giajan a vaccinar en las chasas d'attempads per dar il booster. Quella virola da rinfrestgament gidia sur tut da reducir il ristg da vegnir ospitalisà tar persunas pli veglias. Per pli giuvens è ella impurtanta per reducir il dumber d'infecziuns.