Ils pajaments en la gulivaziun da finanzas muntan il 2017 a 4,987 milliardas francs, quai in augment da radund 55 milliuns francs en cumparegliaziun cun il 2016, scriva il Departament federal da finanzas.
Tar la gulivaziun da finanzas tutga la gulivaziun da resursas, la gulivaziun da grevezzas e la cumpensaziun da l’inegualitad. Tar la gulivaziun da resursas duajan tals chantuns profitar che han damain resursas.
Cun 14 chantuns va ì meglier
La situaziun da 14 chantuns è sa megliurada quai che sa mussa en l’index da resursas. Ma per 12 chantuns è l’index sa pegiurà. Sa megliurà la situaziun èsi il pli fitg en ils chantuns Sutsilvania, Sursilvania e Neuchâtel. Sa pegiurà il pli fitg èsi per ils chantuns Schaffusa, Vad e Soloturn. En tut s’augmentan ils pajaments per ils chantuns cun deblas resursas il 2017 per 2,1% sin 2,350 milliardas francs.
Chantuns donaturs pajan dapli
Il bler en la gulivaziun da resursas paja il chantun Turitg cun 510 (2016:497) milliuns francs. Sin la segunda plazza è il chantun Genevra cun 350 (2016: 346) milliuns francs. Ils terz auts pajaments fa il chantun Zug cun 340 (2016:325) milliuns francs.
Sco sulet chantun dals donaturs paja il chantun Vad damain en la gulivaziun da resursas. Tar ils pajaments da grevezza e la cumpensaziun d’inegualitad auda il chantun Vad tar ils chantuns che survegnan daners.
Chantun Berna survegn anc adina ils blers daners
Il chantun Berna resta era il 2017 il chantun che survegn ils blers daners, quai cun 1,211 (2016: 1,185) milliardas francs. Il chantun Vallais survegn 588 (2016:537) milliuns francs ed il chantun Son Gagl 424 (2016:399) milliuns francs. L’index da resursas da quest chantuns n’è betg sa mida.
Il Grischun tutgà tar il chantun che survegn ils blers daners per grevezzas geografic-topograficas e socio-demograficas, alura suonda il chantun Valais. ¨
Confederaziun profitescha da chareschia negativa
La contribuziun da la Confederaziun en la gulivaziun da las grevezzas munta il 2017 a 715 milliuns francs. Pervi da la chareschia negativa è questa cumpart sa sminuida lev per 0,4% en cumparegliaziun cun il 2016, scriva il departament federal da finanzas.
La cumpart da la Confederaziun per la cumpensaziun d’inegualitad vegn dapi quest onn reducida mintga onn per 5%. Uschia munta el il 2017 a 323 milliuns francs.
RR novitads 12:00