Il management da crisa durant la pandemia da corona duai vegnir optimà, pretenda la Conferenza da las regenzas chantunalas. Cunzunt tar la collavuraziun e la communicaziun tranter Confederaziun e chantuns dettia anc potenzial. Ils chantuns proponan in organ directiv sin nivel politic che sa cumpona a moda paritetica.
Gremi paritetic
Quest organ directiv duai demussar adequatamain la responsabladad cumpartida tranter ils nivels politics, scriva la conferenza en ina communicaziun a las medias. A questa conclusiun vegnan ils chantuns suenter ch'els han analisà la pandemia da corona dal favrer fin il settember. Quest gremi duai surpigliar la coordinaziun cumplaina, giuditgar regularmain la situaziun ed ellavurar la basa per decisiuns cleras e spertas dal Cussegl federal e da las regenzas chantunalas.
Ils chantuns crititgeschan er ch'els sajan vegnids tadlads memia pauc ed hajan magari strusch gì temp da s'exprimer. Sper la mancanza da temp saja era stà diffizil da realisar las mesiras perquai che las decleraziuns ed ordinaziuns sajan vegnidas publitgadas retardà ed i haja er dà malchapientschas tar las reglas.
