La chareschia è sa sbassada surprendentamain cler il schaner en Svizra da 1,7% il schaner 2023 sin 1,3% il schaner 2024. Il stan da 1,3% è il pli bass dapi l'atun 2021. Quai ha communitgà l'Uffizi federal da statistica. Per consumentas e consuments munta quai che products e servetschs èn stads 1,3% pli chars il schaner passà ch'il schaner d'avant in onn. Cumpareglià cun il december 2023 èn ils pretschs da consuments creschids be levet per 0,2%. Quest augment haja tranter auter dà pervia dals pretschs pli auts per l'electricitad e la hotellaria. Era dapli han custà las assicuranzas per vehichels a motor e tschaveras en restaurants e cafés. Sgular è entant vegnì pli bunmartgà, sco era vestgadira e chalzers
Gronda surpraisa
Per economs è il regress da la chareschia ina gronda surpraisa. Els avevan quintà cun ina valur da tranter 1,5 e 2,2%. Cumpareglià cun l'exteriur è la chareschia en Svizra però anc adina moderata. En Germania per exempel è ella stada tar 2,9% il schaner. En l'entira zona da l'euro en media tar 2,8%.