Il settember è la charischia puspè sa sbassada – questa giada dad 1.1% sin 0.8%. Uschia è'la uschè bassa sco l'ultima giada il fanadur 2021. Pia anc avant ch'ils pretschs èn creschids sco consequenza da la pandemia da corona ubain era tras la guerra en l'Ucraina.
Carburant, mobiglias e viadis en l'exteriur èn vegnids pli bunmartgads l'ultim temp. Quai mussan las cifras actualas da la Confederaziun. Il medem mument èn però auters bains dal mintgadi vegnids pli chars – sco per exempel vestgadira, chalzers ubain per part era victualias.
Chareschia franada
En tut è la chareschia franada in zic – e quai per diversas raschuns. Per exempel cumenzan ils pretschs per l'energia puspè a sa reducir. Quai vala surtut per l'ieli e per l'electricitad. Era il ferm franc svizzer contribuescha sia part per franar la chareschia en Svizra.
Situaziun fragila tras la guerra en il Proxim Orient
La Banca naziunala svizra quinta ch'ils pretschs vegnian a crescher pauc ils proxims mais, uschia che la chareschia sa reducescha anc pli fitg. Quai muntassia era pretschs dètg stabils. Relevant per quai saja però era, co la situaziun en il Proxim Orient sa sviluppescha. Sch'il cunflict avess d'influenzar il pretsch da l'ieli, pudess quai puspè laschar crescher ils pretschs. Per il mument na vesi però betg ora uschia.