La UPC aveva segirà la stad passada ils dretgs per mussar ils maletgs dal campiunadi svizzer da hockey. Uschia rapporta a partir da la proxima stagiun partidas da hockey sulet il nov emettur da televisiun MySports. UPC ha dentant connectà be gestiunaris da raits da cabel cun il signal. Uschia ston 1,5 milliuns clients da la Swisscom desister dals gieus proxima stagiun.
L'interpresa affiliada da la Swisscom, Teleclub che enfin ussa gì tala purschida, aveva pussibilità a tut ils emetturs da mussar ils gieus, dentant cun ina purschida limitada. La Swisscom na vul betg acceptar quai ed ha uschia dà en in plant cunter UPC.
La Weko ha confermà ch’ina accusa saja vegnida fatga, il mument na possia ella betg far indicaziuns, scriva l’agentura da novitads SDA.
Istorgia picanta
Tenor la Weko ha la Swisscom surduvrà en il passà sia posiziun da monopol tar transmissiuns da gieus live. Or da quai motiv aveva la Swisscom stuì pajar in chasi da bunamain 72 milliuns francs.
La Swisscom refusa la reproscha ed ha tratg vinavant la sentenzia tar la proxima instanza. Ella haja be vulì proteger sias investiziuns autas cun retegnair tscherts gieus da la concurrenza. Plinavant haja Teleclub gia ils onns avant pussibilità als concurrents da mussar il program cumplet, ma quels n'hajan betg vulì far diever da questa purschida.
UPC cul rumper il monopol
La UPC volva enturn la chaussa. La UPC na vul en nagin cas dar ils dretgs a la Swisscom. «Nus avain mess la finamira da rumper il monopol da Swisscom/Teleclub en la sparta dal sport», di il pledader da UPC Bernard Strapp.
Per quai investin nus ina summa da milliuns. Per proteger questas investiziuns na vegnin nus betg a pussibilitar a la Swisscom da survegnir il signal da l'emettur MySports.
UPC haja fatg contracts cun 14 purschiders per mussar ils gieus sin MySports, di Strapp vinavant. Ulteriurs partenaris possian vegnir vitiers en futur.
Il cumbat vegnia la finala purtà ora sin il dies dals consuments. La Swisscom mussa vinavant gieus da la National Hockey League (NHL), da la Champions Hockey League e dal campiunadi da hockey. Ma tgi che vul vinavant guardar tut ils gieus da hockey stoppia esser client tar omadus, la Swisscom e UPC.
RR novitads 12:00