Siglir tar il cuntegn
Inhalt

Svizra Charrar sperasvi a dretga sin autostrada

Sin autostradas duai esser lubì da charrar sperasvi a dretga. Plinavant duain velocipedists dastgar ir a dretga malgrà che l'ampla è cotschna. Quai propona il Cussegl federal en la consultaziun da las mesiras per meglierar la flussiun e la segirezza dal traffic.

colonna sin autostrada.
Legenda: Il Cussegl federal vul lubir da charrar sperasvi a dretga ed auzar la limita da tempo per vehichels cun char annex. Keystone

Charrar sperasvi a dretga na saja dentant betg surpassar a dretga, explitgescha il Cussegl federal. I saja sulet lubì da surpassar a dretga sch'il traffic saja pli plaun sin il vial da surpassar che sin il vial normal. Tras quai na midian ins betg pli tant il vial, tge che fetschia pli segir la situaziun sin l'autostrada.

100km/h enstagl da 80km/h

Ina midada dal traffic sin l'autostrada pertutga era la limita da tempo maximala per autos cun in char annex. Autos da persunas cun rulottas ni char annex da chavals duain dastgar charrar cun maximalmain 100km/h enstagl da fin uss 80km/h.

Obligatori da furmar giassa da salvament

Il futur duai er esser obligatori da furmar la giassa da salvament. Ils servetschs da salvament hajan savens fadia da cuntanscher il lieu dal accident. La giassa da salvament duain ils vehichels furmar tranter il vial il pli sanester ed il vial segund sanester. La prescripziun vala per autostradas e vias d'autos.

Velos: ir a dretga malgrà ampla cotschna

Sch'il è signalisà lu duain velos dastgar ir a dretga, malgrà che l'ampla è cotschna. Tenor il Cussegl federal è quella regulaziun sa cumprovada durant ina fasa da test da plirs onns a Basilea.

Il Cussegl federal ha lantschà la consultaziun davart las mesiras per meglierar la flussiun dal traffic e la segirezza dal traffic.

RR novitads 11:00