Siglir tar il cuntegn

Header

audio
Martin Candinas è vegnì elegì sco vicepresident dal Cussegl naziunal
Or da Actualitad dals 29.11.2021.
laschar ir. Durada: 03:35 minutas.
cuntegn

Chasa federala Candinas è vicepresident dal Cussegl naziunal

La sessiun d'enviern ha cumenzà cun la saramentaziun da las trais persunas a la testa dal parlament. Irene Kälin è nova presidenta dal Cussegl naziunal e Martin Candinas nov vicepresident. Thomas Hefti daventa president dal Cussegl dals chantuns.

Il parlamentari Grischun Martin Candinas è vegnì elegì oz sco vicepresident dal Cussegl naziunal. Quai cun 172 da 174 vuschs valaivlas. Cunquai surpiglia il Rumantsch e politicher da l'Allianza dal Center il post dal pli aut svizzer il 2023 - sche tut va tenor plan. Candinas che sesa dapi 10 onns en il Cussegl naziunal fiss suenter passa 35 onns l'emprim Grischun che presidiass la chombra gronda. Ses accent vul Candinas metter sin il rumantsch.

audio
Candinas: «Ins duai sentir ch'il rumantsch n'è betg be folclora»
00:20 min, RTR Audio dals 29.11.2021.
laschar ir. Durada: 00:20 minutas.

Martin Candinas (Allianza dal Center)

Avrir la box Serrar la box
Legenda: Keystone
  • cusseglier naziunal (dapi 05.12.2011)
  • cumissiun per traffic e telecommunicaziun
  • cumissiun per la politica da segirezza
  • commember da la direcziun da l'Allianza dal Center Grischun
  • 41 onns, maridà, trais uffants, oriund da Rabius ed abita a Cuira

Nova presidenta dal Cussegl naziunal daventa Irene Kälin. Ella è vegnida elegida cun 151 da 166 vuschs valaivlas. Ella è la terza persuna da l'Argovia che daventa presidenta dal Cussegl naziunal.

Sco presidenta maina Kälin las tractativas dal cussegl, decida l'urden dal di en rom da la sessiun, maina il biro dal Cussegl naziunal e represchenta il cussegl envers anora. Normalmain na s'exprima il president u la presidenta betg davart la chaussa e vuscha be sche la maioritad dals commembers da mintga chombra è necessaria. Sch'i ha tuttina bleras vuschs Gea sco Na, po la presidenta dar la decisiun da tagl.

Irene Kälin (Verds)

Avrir la box Serrar la box
Legenda: Keystone
  • cussegliera naziunala dapi 27.11.2017
  • 34 onns, in uffant, creschida si a Lenzburg e viva cun partenari da vita ad Oberflachs

A la testa dal Cussegl dals chantuns è vegnì saramentà il liberaldemocrat Thomas Hefti, quai cun 44 da 45 vuschs valaivlas.

Thomas Hefti (PLD)

Avrir la box Serrar la box
Legenda: Keystone
  • cusseglier dals chantuns (dapi ils 12.01.2014)
  • cumissiun per economia e taxas 
  • cumissiun da giustia
  • cumissiun da finanzas
  • substitut dal cusseglier dals chantuns Raphaël Comte en la delegaziun da finanzas
  • 62 onns, maridà, oriund da Schwanden ed abita anc adina là

RTR novitads 15:00

Artitgels legids il pli savens

Scrollar a sanestra Scrollar a dretga