Chasti da record per BMW

Il constructur d'autos BMW sto pajar in chasti da 157 milliuns a la Svizra. Quai ha la dretgira federala decidì oz. Motiv per il chasti è stada ina cunvegna da la BMW AG cun ses commerziants en il spazi economic europeic (EWR).

La marca d'autos nobels BMW era sa cunvegnida il 2003 cun ses commerziants dal spazi economic europeic (EWR) da betg exportar ses vehichels ordaifer quest spazi. La dretgira federala svizra ha decidì che schebain che questa cunvegna saja vegnida fatg en l'exteriur, haja questa dentant gì consequenzas per la Svizra. Numnadamain saja quai stà ina isolaziun dal territori.

edifizi dall'interpresa BMW AG a Minca Avrir maletg en lightbox.

Legenda da maletgs: BMW AG edifizi a Minca Keystone

E l'onn passà ha la dretgira federala gì ina decisiun da princip pertutgant cunvegnas che influenzeschan la fiera. Ella ha decidì che la cumissiun da concurrenza (Weko) dastga punir interpresas per cunvegnas da territori, dumber e pretsch. En cas che quellas influenzeschan la fiera senza giustificaziun.

Quels 157 milliuns che vegnan ussa dabun a la cassa federala svizra èn ina summa da record per chastis da la cumissiun da concurrenza (Weko).

Pajà in quart memia bler

Senza quest scumond d'export avessan ils clients svizzers pudì spargnar enfin in quart dal pretsch en il temp da l'euro ferm (atun 2010-2011). E tut tenor model èn quai summas da 7'000 enfin 42'000 francs.

RR novitads 14:00