Persunas sentenziadas per vita duranta na duain betg gia vegnir libras suenter 15 onns. Tenor il cusseglier dals chantuns Andrea Caroni da la Partida liberaldemocratica duaja vegnir examinà pir pli tard sch'ina persuna possia vegnir relaschada da la praschun. Plinavant saja necessari da sclerir la relaziun tranter chasti per vita duranta ed internament (per tudestg «Verwahrung»).
La sanestra era cunter la moziun. Lezza ha argumentà ch'i na dettia nagins problems cun il sistem actual e ch'i giaja atgnamain per prolungar il temp d'arrest. La maioritad burgaisa è percunter stada da l'avis ch'il Cussegl federal possia ponderar co optimar quella pratica actuala. La ministra da giustia Karin Keller-Sutter ha bain confermà ch'il basegn d'agir na saja betg urgent. Tuttina dettia in basegn d'agir ed il Cussegl federal saja pront da far midadas punctualas.