Siglir tar il cuntegn
Inhalt

Svizra Chattà cumpromiss tar gulivaziun da finanzas

Il Cussegl federal vul vegnir encunter als chantuns en connex cun l'adattaziun da la gulivaziun da finanzas.

Stadaira.
Legenda: Il Cussegl federal sustegna il cumpromiss dals chantuns areguard la gulivaziun da finanzas. Keystone

Il Cussegl federal ha approvà ina proposta da cumpromiss areguard la repartiziun dals meds finanzials che vegnan libers. La regenza ha deliberà la missiva da la lescha davart la gulivaziun da las finanzas e da las grevezzas (FiLaG). Sco proxim s'occupescha il parlament cun la proposta.

Mesadad per chantuns pli flaivels

I va per 280 milliuns francs. Per questa summa sa reduceschan ils custs da la Confederaziun, perquai che las resursas da basa per ils chantuns pli flaivels èn vegnidas fixadas da nov sin 86,5%. Ils chantuns pretendan che la mesadad, pia 140 milliuns francs giaja en la gulivaziun socialdemografica. L'autra mesadad duaja vegnir repartida als chantuns ch'èn finanzialmain pli flaivels.

Il Cussegl federal è suandà a la proposta da la conferenza dals directurs da finanzas (FDK). Be quatter chantuns sa dostan cunter la refurma planisada, numnadamain ils chantuns da Berna, Friburg, Giura e Vallais.

Schliaziun per sis onns

La nova schliaziun è temporarmain limitada. Ils chantuns han proponì da reparter ils meds che vegnan libers durant sis onns tenor questa clav. En il fratemp duaja vegnir chattada ina nova schliaziun. Er a questa proposta ha il Cussegl federal ditg Gea.

RR novitads 15:00