Sco mesira urgenta pumpan ins giu l'aua sutterrana contaminada, là nua che l'aua defluescha da la deponia, scrivan il chantun Vallais e l'interpresa chemica Lonza. L'aua pumpada giu, vegn tractada en la serenera da Visp.
Nagin privel per carstgauns ed animals
Tar l'aua tractada n'è la valur betg pli memia auta ha declerà Joël Rossier, schef dal post per l'ambient, a l'Agentura da novitads svizra. Per umans ed animals na dettia nagin privel. Betg pertutgadas èn las tschiffadas d'aua da baiver e d'aua da sauaziun da la regiun sco era las funtaunas dal bogn termal.
Material deponì tranter 1918 e 1978
Lonza deplorescha la contaminaziun da l'aua sutterrana, scriva l'interpresa en ina communicaziun. Tenor stimaziun da Lonza sa tractia d'in deposit vegl ch'è vegnì duvrà tranter ils onns 1918 fin 1978. La substanza nuschaivla benzidin na saja mai vegnida duvrada sco materia prima a Visp e na saja er mai vegnida producida là. Probablamain saja il benzidin sa furmà sco product secundar tar la producziun chemica.
Ulteriuras mesiras pussaivlas
L'interpresa da chemia examinescha ensemen cun las autoritads ulteriuras mesiras per sanar l'anteriura deponia. La deponia da rument cuntegna radund 1,5 milliuns meters cubic restanzas da producziuns chemicas.
Autras examinaziuns avevan gia mussà ina ferma contaminaziun da l'areal entras argient viv ed ammonium. Il chantun ha pretendì il 2016 in'examinaziun detagliada ed in concept da sanaziun da Lonza.
RR novitads 14:00
