Siglir tar il cuntegn

Header

video
Restructuraziuns tar l'agentura da novitads svizra
Or da RTR dals 30.01.2018.
laschar ir. Durada: 2 minutas 9 Secundas.
cuntegn

Svizra Chauma nunlimitada tar la SDA

Il mardi ha il persunal da l'agentura da novitads svizra SDA cumenzà ina chauma. Quai annunzia SDA sez. Ils motivs èn las mesiras da restructuraziun annunziadas cun relaschadas. Pertutgadas da las chaumas èn tuttas spartas da l'agentura da novitads. I dat perquai bler damain novitads.

La direcziun da la SDA haja decidì las relaschadas malgrà ina chauma da trais uras l'emna passada e suenter l'opposiziun massiva ord la redacziun. Uschia communitgeschan la cumissiun da redacziun ed ils sindicats. I vegnia sulet argumentà cun ils custs, e la reducziun dal persunal vegnia realisada senza avair definì ina visiun solida per il futur. Cunquai ch'il CEO Markus Schwab haja ditg en in'intervista che la SDA saja sulet obligada envers ses acziunaris, haja el rut definitivamain la confidenza da la redacziun.

En vista a questa situaziun haja la redacziun decidì il glindesdi saira cun 124 cunter 8 vuschs (tar 6 abstenziuns) da far chauma oz. La redacziun pretendia ch'il cussegl d'administraziun da la SDA fetschia contractivas seriusas cun ina delegaziun da la cumissiun da redacziun e dals sindicats.

Sco quai che la SDA orientescha dettia dentant la pussaivladad da survegnir access a novitads sur agenturas partenarias (AWP, dpa, AFP, Reuters, APA).

RR novitads 07:30

Artitgels legids il pli savens