Siglir tar il cuntegn

Svizra Chauma tar gasettas en Svizra franzosa

Las gasettas dal concern Tamedia en la Svizra franzosa èn oz pli satiglias ch'uschiglio. Quai è ina consequenza da la chauma tar «24 heures», «Tribune de Genève», «Le Matin» e «Le Matin Dimanche». Betg chaumà vegn tar «20 minutes».

diversas gasettas da la Svizra franzosa
Legenda: Sin las reacziuns da las gasettas romandas da Tamedia na vegn betg lavurà. Keystone

L'ediziun da «Le Matin» ha mo 24 paginas, radund 20 paginas pli pauc ch'usità. I manca l'editorial e la pagina dubla cun novitads maschadadas. Sulet ina pagina s'occupescha da l'intern dal pajais, ella s'occupescha cun la chauma sin la redacziun.

Sin ils frontispezis da la «Tribune de Genève» e da «24 heures» orientescha la direcziun las lecturas ed ils lecturs ch'i dettia pli pauc cuntegn pervi da la chauma.

La chauma ha cumenzà il mardi suentermezdi. Ils schurnalists protestan cunter ils plans da Tamedia da vulair sistir l'ediziun stampada da «Le Matin» e che la chasa editura renviescha cunter-propostas da la redacziun.

Tamedia smanatscha

Il concern da medias ha appellà ultimativ da terminar per immediat la chauma, uschiglio pudessia Tamedia visar il contract collectiv da lavur. L'acziun mettia en dumonda quest contract. La direcziun da Tamedia saja stada transparenta dapi il cumenzament da la fasa da consultaziun ils 8 da zercladur. Ella haja mess a disposiziun las cifras relevantas e respundì tuttas dumondas da las partidas involvidas en sedutas constructivas, uschia scriva il concern.

RR novitads 09:00