Siglir tar il cuntegn

Header

Estermann cun il chaval Lord Pepsi.
Legenda: Estermann e Lord Pepsi, in dals chavals ch'el duai avair maltractà. Keystone
cuntegn

Chavaltgar Estermann sentenzià pervi da maltractament d'animals

Il sportist d'elita e chavaltgader svizzer Paul Estermann è vegnì sentenzià culpant. Tenor la dretgira districtuala da Willisau ha el maltractà intenziunadamain dus chavals. La decisiun n'ha anc betg vigur valaivla, ed Estermann ha annunzià da far recurs.

Cun duvrar excessiv la giaischla haja Estermann violà l'integritad e la dignitad dals chavals, hai num en l'argumentaziun da la sentenzia. Estermann che tutga dapi ils gieus olimpics 2012 tar l'elita dals chavaltgaders d'obstachels, vegn sentenzià ad ina multa ed in chasti pecuniar.

Las renfatschas

In dals collavuraturs dad Estermann ha lantschà il cas. El aveva purtà plant e preschentà fotografias. Sinaquai ha la procura publica renfatschà ad Estermann d'avair giaschlà la chavalla Castelfield Eclipse l'onn 2016 duas giadas enfin ch'i saja vegnì sang. Il chaval chastrà Lord Pepsi haja Estermann maltractà cun la giaschla almain trais giadas tranter il 2014 e 2017.

Il derschader singul ha constatà ch'ils fatgs preschentads sajan cumprovads cun perditgas, in rapport dal veterinari e fotografias.

Estermann fa recurs

La sentenzia n'ha anc nagina valur legala. Estermann ha annunzià da far recurs cunter la sentenzia. Ses advocat metta en dumonda la forza da cumprova da las perditgas e da las fotografias.

RR novitads 11:00