Il Chor viril rumantsch, quai saja stà in'instituziun a Berna. In lieu d'inscunter per ils Rumantschs che vivevan ni lavuravan en la chapitala federala, sa regorda il dirigent actual Remigi Latour.
Mo oz cumbatta ses chor, sco blers auters era, cun la mancanza da chantadurs. Ils megliers temps dumbravani da quai da 35 chantadurs. Oz sajan els anc diesch. Memia pauc per chantar en quatter vuschs.
Sez in pau la culpa
Qua sajan els forsa era sez in pau la culpa, conceda Remigi Latour, che maina la batgetta dapi 15 onns. «Nus avain laschà ir quai in zic empè da far premura e da mirar per chantadurs giuvens. Ussa avain nus vis ch’igl è la davosa pussaivladad da salvar il chor.»
Ils chors, pli baud il nuschegl cultural da las uniuns rumantschas da la Bassa, svaneschan pli e pli. Questa stad ha per exempel il Chor maschedà rumantsch da Berna decidì da chalar.
Ferma persvasiun da chattar chantadurs
Remigi Latour vul franar quai svilup ed el è persvadì ch'i dettia a Berna e conturn umens che han gust da s'inscuntrar trais sairas il mais cun auters amaturs dal chant rumantsch. «I dat blers che han adina gì plaschair d’udir nossas chanzuns rumantschas. I fiss fitg donn sche quellas chanzuns na vegnan betg pli chantadas. E da l’autra vart èsi pussaivel cun pauca lavur da puspè furmar in stupent chor per chantar en quatter vuschs. Quels che manchian sajan dentant ils tenors. Ina sort spezia rara», di Latour.
Bittar la fautsch en chanvà nagina opziun
Tschintg ni sis chantadurs spera el da chattar enfin mez settember. Ils 12-09 veglian els puspè cumenzar cun las provas, quai en la sala da l’ustaria Union en la citad veglia da Berna. E la fin da l'auter onn forsa dar in pitschen concert. Tant saja dentant segir: Bittar la fautsch en chanvà na saja nagina opziun per Remigi Latour. «I stoppia bain esser pussaivel da chattar anc intgins buns chantadurs. La speranza na dain nus betg si, quai per che nus possian chantar vinavant», uschia Remigi Latour.
Contact: Chor viril rumantsch Berna: Remigi Latour, Mühlemattweg 8, 3324 Hindelbank, M: 079 652 38 63