Siglir tar il cuntegn

Svizra Christa Markwalder è la pli auta Svizra

Christa Markwalder da la PLD è vegnida elegida sco nova presidenta dal Cussegl naziunal, e quai cun 159 da 183 vuschs valaivlas. La dunna da 40 onns surpiglia uschia il post da la pli auta Svizra.

Christa Markwalder (PLD) survegn in matg fluras suenter ch’ella è vegnida elegida sco presidenta dal Cussegl naziunal.
Legenda: Gratulaziuns per Christa Markwalder (PLD) suenter ch’ella è vegnida elegida sco presidenta dal Cussegl naziunal. Keystone

Cumpareglià cun ils onns avant è quai plitost in magher resultat. 14 cedels en restads vits ed il Cusseglier naziunal Christian Wasserfallen ha survegnì 12 vuschs. Ses antecessur en uffizi Stéfan Rossini aveva fatg 170 vuschs e Ruedi Lustenberger in onn avant aveva fatg 175 vuschs. Sco president dal Cussegl dal chantuns è il liberaldemocrat dal chantun Neuchâtel, Raphaél Comte vegnì elegì cun 44 vuschs.

Nov parlament ha cumenzà sia lavur

En la Chasa federala a Berna ha cumenzà oz suentermezdi la sessiun d'enviern, l'emprima giada en la nova cumposiziun. Al cumenzament da la nova legislatura èn ils commembers dal Cussegl naziunal vegnì saramentads. En tut èn 54 commembers da 200 cusseglieras e cussegliers naziunals da nov elegids en Chasa federala.

La Partida populara svizra (PPS) è cun 68 commembers la ferma fracziun, ils socialdemocrats (PS) cun 43 mandats la segund ferma, la Partida liberalademocratica (PLD) cun 33 commembers la terz ferma e la Partida cristiandemocrata (PCD) cun 30 commembers la quart ferma fracziun.

L'emprim di dal noviz a Berna

Legenda: Guardar il video «L’emprim di da lavur per Duri Campell sco Cusseglier naziunal». Durada 4:32 minutas.
Or da Telesguard dals 30.11.2015.