Siglir tar il cuntegn
Inhalt

Svizra Christian Amsler va en la cursa per la PLD

Il cusseglier guvernativ Christian Amsler da Schaffusa vul entrar en il cumbat per in sez en il Cussegl federal. La PLD dal chantun Schaffusa ha nominà el a la cumissiun per chattar in candidat u ina candidata.

Christian Amsler.
Legenda: La PLD da Schaffusa ha nominà Christian Amsler. Keystone

I n'ha anc mai dà in Cusseglier federal dal chantun Schaffusa. La PLD da Schaffusa sa legria d'entrar en il cumbat cun Christian Amsler, che duai succeder a Johann Schneider-Ammann. Sco anteriur president da la Conferenza svizra da las directuras e dals directurs chantunals da l'educaziun publica saja Amsler connectà bain a Berna, scriva la PLD en lur communicaziun. Plinavant saja el sa profilà durant blers onns sco president communal, cusseglier guvernativ e sco directur da la conferenza da directurs.

Emprim candidat uffizial

Il mument è Amsler l'emprim candidat d'ina partida chantunala da la PLD. La cussegliera dals chantuns Karin-Keller Sutter ha bain annunzià ch'ella stettia a disposiziun per l'elecziun. Uffizialmain decida la PLD dal chantun Son Gagl a la radunanza da nominaziun ils 20 d'october. Era Hans Wicki da la Sutsilvania ha annunzià da vulair candidar. Las partidas chantunalas da la PLD pon anc inoltrar candidaturas fin ils 24 d'october.

RR novitads 21:00