Siglir tar il cuntegn

Header

cuntegn

Cifras 2023 UBS fa gudogn da 29 milliardas – malgrà perdita il davos quartal

  • Sut il stritg ha la nova UBS Group fatg il quart quartal ina sperdita da 279 milliuns dollars americans.
  • Per l'entir onn 2023 preschenta l'UBS entant in gudogn da record da 29 milliardas dollars americans – grazia a la surpigliada da la Credit Suisse.
  • Tenor l'UBS han clientas e clients da la banca affidà ulteriuras 77 milliardas dollars a facultads d'investiziun dapi la surpigliada da la CS.
  • La banca vul reducir ses custs massivamain fin il 2026.

Per l'emprima giada dapi la surpigliada da la CS il mars passà ha la nova banca preschentà ses resultat annual. La surpigliada d'urgenza da la Credit Suisse ha purtà a l'UBS in gudogn da record il 2023. Sut il stritg ha la banca gronda svizra gudagnà 29 milliardas dollars, uschia ha communitgà l'UBS. L'onn avant aveva ella fatg in gudogn da 7,6 milliardas dollars – anc avant la cumpra.

L'UBS vul spargnar massivamain fin il 2026

Avrir la box Serrar la box

L’UBS ha finamiras ambiziusas en connex cun l’integraziun da la Credit Suisse. Ella vul reducir fin la fin da l’onn 2026 ils custs bruts per var 13 milliardas dollars en cumparegliaziun cun il stan da l’onn 2022. Las societads svizras da l'UBS e la CS duain vegnir fusiunadas fin il terz quartal da l’onn 2024.

Contribuì al gudogn ha la fusiun da las duas bancas relevantas per il sistem, perquai ch’il pretsch da cumpra correspundeva be ad ina part da l’agen chapital da Credit Suisse. La dividenda vul la banca auzar per 27% sin 0,70 dollars per aczia.

Cun la fusiun da las unitads giuridicas UBS SA e Credit Suisse SA quinta il concern enfin la fin dal segund quartal 2024. Suenter vul l’UBS puspè prender si il program da recumpra d’aczias. L’onn current vul la banca far recumpras en il volumen da fin ina milliarda dollars.

Blers daners novs

Avrir la box Serrar la box

L’UBS discurra en la communicaziun d’ina gronda fidanza da la clientella, quai saja sa mussà tar las affluenzas da facultad. La banca haja registrà il quart quartal da nov netto 22 milliardas dollars. Dapi la fin da la surpigliada da la CS sajan quai stadas 77 milliardas.

En l'entir concern ha l'UBS administrà uschia per la fin da december facultads en l'autezza da 5'714 milliardas dollars. La fin da settember eran quai anc stà 5'373 milliardas.

Perdita en il quart quartal

Sut il stritg ha la nova UBS Group scrit il quart quartal ina sperdita da 279 milliuns dollars. Igl è il segund quartal che la CS vegn quintada vitiers. Il terz quartal aveva la UBS fatg ina sperdita da 785 milliuns. Avant deducir la taglia è resultà in minus da 751 milliuns, tenor communicaziun è cuntegnida tranter auter ina sperdita da 508 milliuns dollars en connex cun la participaziun a la SIX Group. Sin basa repassada discurra l’UBS d’in gudogn avant che deducir la taglia per la perioda da l’october fin il december 2023 da 592 milliuns.

La Banca cumbinada haja gia reducì cleramain ils custs. Tenor las indicaziuns hajan ins gia spargnà custs da radund 4 milliardas dollars per la fin da l'onn da fatschenta 2023 cumpareglià cun l'onn 2022. Ils custs d'integraziun muntavan ad 1,8 milliardas il quart quartal.

RTR novitads 07:00

Artitgels legids il pli savens