Tranter citad e champagna datti differenzas en il provediment medicinal da basa. En la citad devi in provedider da basa per 1'000 abitantas ed abitants. En la champagna devi 0,4. Quai mussan las pli novas cifras da l'Uffizi federal da statistica dal 2021.
I na dat betg mo main medias e medis en la champagna. Els lavuran era pli ditg, en media 3,2 uras pli ditg per emna. Ed els lavuran pli savens en il servetsch d'urgenza. Da las medias ed ils medis che lavuran en il provediment da basa, fan trais quarts servetsch d'urgenza. En las citads èsi la mesadad.
Grondas differenzas datti era tar la schlattaina. En las citads èn 49,4% medias activas en il provediment da basa. En las champagnas lavuran mo 37,1%.
En l'entira Svizra lavuran adina dapli medias. Il cumpart d'ellas che lavuran en il provediment da basa è creschì aifer trais onns per 4,5%. Era la cumpart da medias e medis da l'exteriur è creschì per 4,5%. Da quels lavuran era dapli en la champagna ch'en las citads.
