Prender mesiras pli severas a moda pauschala na portia betg bler, ha Ueli Maurer ditg en l’intervista cun la gasetta «Südostschweiz am Sonntag». I fiss la via fallada da puspè serrar scolas e serrar en glieud. Ins stoppia emprender da vegnir a frida cun il virus.
Nus stuain pudair viver!
Betg mo il dumber da novas infecziuns quintia, mabain er las ospitalisaziuns ed ils mortoris – ha il cusseglier federal ditg. Sulet pervi da corona arrivian mo paucs en l’ospital, il pli savens pateschian ils pazients gia d’autras malsognas.
Fin uss haja la Svizra dumagnà la crisa da corona detg bain. Il pajais haja chattà ina atgna via che saja raschunaivla, ha Ueli Maurer manegià en l’intervista. Uschia haja era num cuntinuar.
Dentant haja quai custà in pau bler. Actualmain muntian tut ils custs en connex cun la pandemia a 25 fin 30 milliardas francs.
