La parahotellaria svizra ha dumbrà il 2018 radund 16,6 milliuns pernottaziuns – quai è in augment da passa 4% cumpareglià cun l’onn avant. Quai resorta da las cifras da l’Uffizi federal da statistica, che ha evaluà las statisticas da las 13 regiuns turisticas da la Svizra.
Las pli bleras pernottaziuns registreschan las abitaziuns da vacanzas gestidas commerzialmain – numnadamain 7,5 milliuns e 2,9% dapli che anc il 2017.
Campadis èn en il trend
Il pli grond plus han nudà ils campadis. Ils meglers giasts sin ils campadis svizzers èn il svizzers sez: Els genereschan radund 2,4 milliuns pernottaziuns dal total da radund 3,6 milliuns pernottaziuns sin campadis en Svizra. Sin plazza duas dals campaders sun ils tudestgs cun be anc radund 460'000 pernottaziuns
Er albierts da giuventetgna èn trendy tar svizzers
Da las 5,4 milliuns da pernottaziuns en alloschis collectivs sco albierts da giuventetgna van la pli gronda part sin conto dals giasts svizzers – numnadamain 4,4 milliuns. La cifra dals visitaders da l'ester è sa reducida per 5,1% sin 1,1 milliuns.
4 da 5 esters en abitaziuns da vacanzas èn da l'Europa
Auter guarda quai ora tar las pernottaziuns en abitaziuns da vacanzas. Là noteschan ils statistichers da la Confederaziun in plus marcant tar ils giasts da l'ester: Las pernottaziuns tar questa gruppa da giasts èn creschidas per 9% sin 3,2 milliuns. Quai en emprima lingia pervi dals giasts da l'Europa – 4 da 5 giasts èn numnadamain europeans.
RR novitads 12:00